As money dey show,
And life dey sweet small small,
And as my own dey better pass my neighbour own,
Na so I call oga bricklayer make e
come help me build wall.
I say “fence de house round,
block everywhere,
Make you make sure sey e tall well well!”
Na so block dey climb block every day
for three months,
until even breeze sef no see space
to shake body.
My neighbour stand, him pikin sef dey look,
Dem mouth quiet but dem eye dey talk,
Like sey dem sabi wetin go still happen
As dem build my fence finish,
I like am well well,
Until Humpty Dumpty go siddon on top.
Wall no gree, e fall yakata for ground—
E scatter my ride,
E even almost catch me inside!
Glass shatter for ground,
I vex, but wetin vex go do?
Mechanic laugh my car tire,
bricklayer confuse,
Me, I just sidon, dey tink wetin I dey do.
Why I need wall wey no go let my
children fit play as dem like?
Why I build fence when joy dey
waka free from one house to anoda house?
E nor need knock.
So I tell oga bricklayer, “No build am back.
Clear all the blocks,
make breeze see road pass.”
Life suppose simple,
why we like to dey make am hard?
Pikin dem dey play, no border, no visa.
But no wall to fall, no wahala at all.
And Baba Humpty?
Dat one don disappear!