01
Vigilante! Vigilante!
All de sleep wey una don dey sleep never do?
E never reach una time to wake?
I say ma tell una sey
night don reach us o
Light don waka commot o
Everywhere don dark o
We no dey see road again o
I say ma tell una sey
de light wey una promise us no reach us o
de torchlight no reach us o
de lantern sef no reach us o
De people wey una swear sey una go guide
don waka inside koto finish o
Dem no dey see road again o
All of dem don begin dey waste troway
Like food wey dog chop remain.
Vigilante! Vigilante!
How many times I call una?
rat no dey cry like rat again o
Rat don dey cry like fowl
Vigilante! Vigilante!
Fowl no dey cry like fowl again o
Fowl don dey cry like rat
Everywhere don mess
Everywhere don vex
Everywhere don scatter
02
Vigilante! Vigilante!
All de sleep wey una don dey sleep never do?
E never reach una time to wake?
I say ma tell una say
Lion don break fence o
All de sheep don die finish o
Everywhere don red o
We no dey see white again o
I say make I tell una say
de better fence wey una promise us no reach us o
De blanket no reach us o
De alarm no reach us o
All de sheep wey una swear sey una go guide
No be dia body na im lion dey chop so?
Na one eye dem take dey sleep for night o
All of dem don begin dey waste troway
Like water wey dem take wash cloth
Vigilante! Vigilante!
How many times I call una?
rat no dey cry like rat again o
Rat don dey cry like fowl
Vigilante! Vigilante!
Fowl no dey cry like fowl again o
Fowl don dey cry like rat
Everywhere don mess
Everywhere don vex
Everywhere don scatter
