Taink God sey dem change our anthem,
I swear dat song na curse,
Na dat song na im cause all our sufferhead,
na im make everytin just worst
Taink God sey dem change our national anthem
Song wey dey cause corruption.
You no see sey as we dey sing dat song,
na so our skin dey scratch us?
Direction, our leaders no see!
Guidance, e finish for market.
Truth? Our youth still nor know!
Love and honesty nko, dem two miss road
Why dem no go kidnap our children?
Why hunger no go wire us?
Instead of sey make we dey hail Nigeria,
We dey try wake compatriots from sleep!
Taink God sey dem don return our original song,
original okrika from Obodo-oyibo!
Taink God sey dem change dat rubbish anthem
Anthem wey dey cause potholes
Una wey get glass, abeg make una raise am up.
Make una hail Nigeria wit me.
And if hunger no allow you raise hand,
just tok: Nigeria, we hail thee
