For dis economy wey even
mosquito no see blood suck,
talkless of winch,
you carry money go buy zobo
For dis economy wey blood no dey flow
reach where e suppose reach,
you go dey toast babe;
still kom buy am 200 Naira recharge card
For dis economy wey even
new born pikin no dey see milk drink again,
you balance eba with okro;
I even see pomo inside.
For dis economy wey even
big man belle don burst,
I hear sey you dey do fit fam,
dey chop carrot and cucumber
For dis economy wey trekking wan
finish everybody, you get money to take enter danfo,
you even siddon for front
My chairman sir,
Abeg tell me:
How you take dey run am?
***
Slang of the Week: To para
MEANING: To get angry
ETYMOLOGY: Unknown
USAGE: “Pipo dey para say di prices of food, petrol, light and oda essentials don go up” – BBC Pidgin, 1 August 2024
Thought of the Week
“Na who mess for bus na im dey squeeze face pass”