“Sule, no dey yarn nonsense!
Why you go tok sey Naija no move?
You don sell sense buy corn?!
You no see as ‘Presdent’ don replace ‘President’?
How rice don turn gold; garri silver?
No be new, sorry – born again anthem you dey sing?
Forget am, we don move
Yahoo don enter list of professions
Police station don dey go holiday
Urgent 2k don be ‘Good morning'”
“Ehm, boda Chika, abeg look road o,
e be like sey you don put your motor for reverse”
***
Slang of the Week: Woto woto
MEANING: To deal with someone thoroughly
ETYMOLOGY: Unknown
USAGE: “Dem do us woto woto for Olympics”
Thought of the Week
“E go better, e go better, na im make camel still dey carry load.”